ลิ้นปะเทด

วิชัย จันทร์สอน : เรื่อง

อัศจรรย์ใจโอ้ ข้าวสารอยู่โอยอคอตอดไก่ ไม้ไผ่อยู่กอยอคอตอดข้าง

ปลาย่างอยู่หิ้งสะยานเต้นคุบแมว แมวเสียใจแถหัวไปบวช

หนูซิงตาสวดเป็นแม่ออกค้ำ หุงเข้าส่งเพล (กลอน) (2532 : 183)*

ใสใยแจนแวนจั้น แมงมุมกันจะนา

ฝนมาฟ้าวฝั่งป๋า ตากล้าสิตายเพลี้ย

หมากเขีย,บวบตายคาค้าง เบี้ยมุ่งม้างฮามไฮ่

สุดอัศจรรย์ใจ เหล้ามาแปรเปลี่ยนธาตุ

เป็นส่ำซาติ ซุมน้ำปลา

คือซ่างว่าสาคูแป้ง มางึดแฮงเดผงเฮฝิ่น

ลิ้นปิ้นแป้ปากเกลี้ยง ส่นเสี่ยงไว้บ่อีดู

คึดเบิ่งดูโมงแม่ง เสี่ยวฮักแพงบ่ขี้ถี่

มิดซี่ลี่ปากบ่ถ่อง บักก้องด้องอ้อปล้องดี

ผีสบมีสังวาด เซื้อส่ำซาติบุญผลา

ลมส่าเสียงเปิ้งเปิ้ง เถิงบาท่าวบ่สะเทือน

เฮือนบ่มีคนหลัก ปักตูบ่มั่นแก่น

ไผสิมาแสนแพน ฮีตคองขาดสะบั้น

คันแทม่างน้ำบ่ยัง แท่แหลว

*อ้างอิง : ปรีชา พิณทอง. สารานุกรม ภาษาอีสาน-ไทย-อังกฤษ. อุบลราชธานี : ศิริธรรม, 2532.

หมายเหตุ : บรรณาธิการต้นฉบับ โดย ธีรยุทธ บุษบงค์ กวีชาวศรีสะเกษ ผู้คร่ำหวอดในวงการกวีถิ่นอีสาน

Scroll Up