ลมหายใจหน้าฮ้านหมอลำ (12) – ลำเดินไล่เผด็จการ

ภาพปกจากกิจกรรมขอนแก่นพอกันทีครั้งที่ 2 เมื่อวันที่ 14 มีนาคม 2563 โดย อติเทพ จันทร์เทศ

ปฏิภาณ ลือชา คำร้อง/ทำนอง  

 

บ้านเมืองเฮาเดือดฮ้อน  

ประชาชนถืกข่มขู่ พี่น้องเอ้ย  

เถิงมื้อนี่ คันผู้ได๋บ่สู้  

ความฉิบหายฮอดหมู่เจ้า  

ไวๆ ฟ้าว อย่าสิกลัว… พี่น้องเอ้ย

 

ข่าวล่ามาแฮงอีหลี  

ยุคสมัยนี้ เผด็จการครองเมือง   

จับคนเข้าคุกขังซังเตๆ  

โอ้ย มาสูนหลายเด้  บ้านเมืองเฮาล่มจม  

ข่อยอยู่อีสานบ้านนา บ่มีไผหัวซารัฐบาลผีห่า

มันยึดอำนาจไปจากชาวประชา  

เอากฎหมายเข่นฆ่าข่มเหงประชาชน

         

ทนบ่ได้ อยู่บ่ไหวแล้วเด้อพี่ๆ  

จั่งได้มามื้อนี่ หวังสู้บ่ถอย  

สู้บ่ย่านรัฐบาลผีห่า 

สู้บ่ย่านเผด็จการผีห่า 

ชาวประชาพี่น้อง อย่ายอมแพ้แก่มัน  

ให้เมืองบ้านประชาชนเป็นใหญ่  

ซุมจังไฮปอบเป้า หมู่เฮาล้มอย่ากลัว  

อย่าเมามั่วนำรัฐประหาร  

เผด็จการสูญพันธุ์ ประชาชนเจริญก้าว

         

เผด็จการเอาคำหวานมาอ้อนออด 

แท้จริงยังบ่ถอดหน้ากากซาตาน

นักบุญใจบาปทำรัฐประหาร  

บ้านเมืองแฮ่งแหลกลาญ… มันกดหัวประชาชน

 

รอยยิ้มเผด็จการคือนักฆ่า  

ปืนที่มันสะพายมา ไว้จ่อหัวหมู่เฮา  

ไผบ่ฟังควม มันจะทำฉิบหาย 

ปืนลั่นไกส่งความตาย เอากฎหมายมาข่มคอ 

พ่อแม่ข่อย ได้ฟังลำให้บอกต่อ  

คันหมู่เฮากลัวย่าน มันแฮงฆ่าข่มคอ  

มาเด้อท่าน มาโฮมกันเป็นหมู่  

เอาพลังผลักยู้ นำสู้เผด็จการ 

เปลี่ยนเมืองบ้าน อำนาจของประชาชน 

 สู่เสรีนำชัย หมู่ประชาเจริญก้าว

วิดีโอนี้ถูกบันทึกระหว่างการชุมนุม “ขอนแก่นพอกันที” เมื่อวันที่ 4 มีนาคม ของนิสิตนักศึกษาและประชาชนกลุ่ม มข.พอกันที หลังการยุบพรรคอนาคตใหม่ของตุลาการศาลรัฐธรรม จัดที่ลานอเนกประสงค์ข้างคณะนิติศาสตร์ ม.ขอนแก่น
 
Scroll Up